អង្គការ​ក្រៅរដ្ឋាភិបាល​​ស្នើ​បន្ត​បង្កើន​ការ​យក​ចិត្ត​ទុកដាក់​​លើកកម្ពស់​វិស័យព័ត៌មាន​ និងពន្លឿនការអនុមត័ច្បាស់សិទ្ធិទទួលព័ត៌មាន

រាជធានីភ្នំពេញ ថ្ងៃទី០២ ខែឧសភា ឆ្នាំ២០២៣—ការប្រារព្ធខួបទី៣០នៃទិវាសេរីភាព​សារព័ត៌មាន​នៅឆ្នាំ​២០២៣នេះត្រូវបាន​ធ្វើឡើងរួមគ្នា នៅព្រឹក​ថ្ងៃទី២ ខែ​ឧសភា ឆ្នាំ២០២៣ ក្នុង​រាជធានីភ្នំពេញ ​ដោយ​ក្រុម​អង្គការ​សមាគមសារព័ត៌មាន និង​អង្គការ​សមាគម​មិនមែនរដ្ឋាភិបាលជាង១០ ក្រោមកិច្ចសហការជាមួយបណ្ដាដៃគូអភិវឌ្ឍន៍។ ព្រឹត្តិការណ៍នេះមាន​អ្នក​ចូលរួម​ប្រមាណ២០០នាក់​ រួមមាន អ្នកសារព័ត៌មាន តំណាងអង្គការសង្គមស៊ីវិល យុវជន ព្រមទាំងភាគី ​ពាក់ព័ន្ធផ្សេងទៀត។

News in English: https://bit.ly/3NFShXc

ទិវា​ដ៏សំខាន់នេះ ប្រព្រឹត្តទៅក្រោមប្រធានបទ “ការ​កំណត់​អនាគតនៃ​សិទ្ធិ​៖ សេរីភាពនៃការបញ្ចេញមតិជាកម្លាំងចលករនៃសិទ្ធិមនុស្សដទៃទៀត” ។ ក្រុម​អង្គការ​ សមាគមសារព័ត៌មាន និង​អង្គការ​សមាគម​មិនមែនរដ្ឋា-ភិបាលដែលធ្វើការងារពាក់ព័ន្ធនឹងការ​​លើក​កម្ពស់សិទ្ធិ​ទទួល​ព័ត៌មាន សេរីភាព​សារព័ត៌មាន និង​សេរីភាព​បញ្ចេញមតិក្នុងប្រទេសកម្ពុជា ដូចមានរាយនាមខាងក្រោម ទទូច​ស្នើ​សុំ​ដល់​រាជរដ្ឋាភិបាល ​និង​ដៃគូពាក់ព័ន្ធទាំងអស់ ឱ្យបន្តយក​ចិត្ត​ទុកដាក់ឱ្យបានច្រើន​ជាង​នេះ ដើម្បី​ពិនិត្យតាម​ដាន និង​ដោះស្រាយ​នូវ​សំណើដូចខាងក្រោម​៖

1. ធានាឱ្យបាននូវបរិយាកាសប្រកបដោយសេរីភាព សន្តិសុខ និងសុវត្ថិភាពពេញលេញសម្រាប់អ្នកសារ-ព័ត៌មាន និងស្ថាប័នព័ត៌មាន ក្នុងការបំពេញការងារវិជ្ជាជីវៈដោយមិនមានការរឹតត្បិត និងភ័យខ្លាច ជាពិសេសនៅមុន​​ អំឡុងពេល និងក្រោយពេលបោះឆ្នោតជ្រើសតាំងតំណាងរាស្រ្តនៅខែកក្កដា ខាងមុខនេះ។  
2. ស្នើដៃគូអភិវឌ្ឍន៍បង្កើនការផ្ដល់ការគាំទ្រដល់សារព័ត៌មានឯករាជ្យ​​ ព្រមទាំងស្ថាប័នសង្គមស៊ីវិលដែលផ្ដល់សេវាការពារ និងជួយសង្គ្រោះបន្ទាន់ដល់អ្នកសារព័ត៌មានដែលស្ថិតក្នុងហានិភ័យ ដោយសារការបំពេញការងារវិជ្ជាជីវៈរបស់ពួកគេ។ 
3. បញ្ឈប់រាល់ការធ្វើទុក្ខបុកម្នេញគ្រប់ប្រភេទទៅលើស្ថាប័នសារព័ត៌មាន និងអ្នកសារព័ត៌មានដែលហ៊ានរាយការណ៍បញ្ហាអសកម្មផ្សេងៗក្នុងសង្គម ហើយដោះលែងអ្នកសារព័ត៌មានទាំងឡាយណាដែលកំពុងជាប់ពន្ធនាគារដោយសារការបំពេញវិជ្ជាជីវៈសារព័ត៌មាន ជាពិសេសសូមបញ្ឈប់ការ​ប្រើ​ប្រាស់​ច្បាប់​ស្តីពី​ក្រម-​ព្រហ្មទណ្ឌដាក់ទោសទណ្ឌអ្នកសារព័ត៌មាន។ 
4. ស្នើឱ្យរាជរដ្ឋាភិបាល និងសភាជាតិ អនុម័តឱ្យបានឆាប់នូវច្បាប់ស្ដីពីសិទ្ធិទទួលព័ត៌មាន ដែលស្របតាមបទដ្ឋានអន្តរជាតិ និងមានប្រសិទ្ធភាពក្នុងការអនុវត្ត។ 
5. ស្នើឱ្យរាជរដ្ឋាភិបាលបើក​ឱ្យមានការ​ប្រឹក្សាយោបល់​ទូលំទូលាយ និង​ទទួល​យក​នូវ​ធាតុចូល​ពី​ដៃគូ​ពាក់ព័ន្ធ​  ក្នុងដំណើរការនៃការធ្វើវិសោធនកម្មច្បាប់ស្ដីពីរបបសារព័ត៌មាន និងការធ្វើសេចក្ដីព្រាងច្បាប់ថ្មីៗមួយចំនួនដូចជា ​សេចក្តីព្រាង​ច្បាប់​ស្តីពី​ឧក្រិដ្ឋកម្ម​តាម​ប្រព័ន្ធបច្ចេកវិទ្យា សេចក្តីព្រាង​ច្បាប់​ស្តីពីសន្តិ-សុខសាយប័រ និង​វិធានគតិយុត្តផ្សេងទៀតដែល​អាច​នឹង​ប៉ះពាល់ដល់​សេរីភាព​សារព័ត៌មាន និង​សេរី-ភាព​បញ្ចេញមតិ។​ 
6. ស្នើឱ្យរាជរដ្ឋាភិបាលបង្កើនកិច្ចខិតខំប្រឹងប្រែងក្នុងការ​លុប​បំបាត់​រាល់ទម្រង់នៃការ​បៀតបៀនលើ​​អ្នក-​សារព័ត៌មានស្រ្តី ដើម្បីបង្ហាញពីការប្តេជ្ញាចិត្តរបស់រដ្ឋាភិបាលក្នុងការ​ជួយជំរុញឱ្យ​មានការ​ចូលរួម​កាន់តែច្រើន​ឡើងនៃ​ចំនួន​ស្រ្តី​នៅក្នុង​វិស័យសារព័ត៌មាន។

អង្គការសមាគមមិនមែនរដ្ឋាភិបាល ​ដែល​ចូលរួម​គាំទ្រ​សេចក្តី​ថ្លែងការណ៍នេះរួមមាន ៖  

1. សមាគមសម្ព័ន្ធអ្នកសារព័ត៌មានកម្ពុជា (CamboJA) 

2. មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) 

3. មជ្ឈមណ្ឌលសិទ្ធិមនុស្សកម្ពុជា (CCHR) 

4. គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ​(COMFREL) 

5. មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) 

6. បណ្ដាញយុវជនកម្ពុជា (CYN) 

7. អង្គការកម្មវិធីអភិវឌ្ឍន៏ធនធានយុវជន (YRDP) 

8. អង្គការអភិឌ្ឍន៍សំលេងសហគមន៍ (BCV) 

9. មណ្ឌលព័ត៌មាន ស្ត្រីកម្ពុជា (WMC) 

10. សមាគមការពារសិទ្ធិមនុស្ស និងអភិឌ្ឍន៍នៅកម្ពុជា (ADHOC) 

11. អង្គការថែរក្សាភាសាជនជាតិដើមភាគតិច (CIPL) 

12. អង្គការតម្លាភាពកម្ពុជា (TIC) 

13. អង្គការសម្ព័ន្ធភាពដៃគូដើម្បីការអភិវឌ្ឍតាមបែបប្រជាធិបតេយ្យ (CPDD)